མ་གཅིག་ཁ་བརྡ།༼ཟིན་བྲིས།༽

Image from 1st Khabda in Chennai (March 2, 2019)

བོད་རྒྱལ་ལོ་༢༡༤༦། སྤྱི་ལོ་༢༠༡༩་ལོའི་ཟླ་༣་པའི་ཚེས་༢།

རྒྱ་གར་ལྷོ་ཕྱོགས་རྒྱ་མཚོའི་མཐའ་ཡི་ཅན་ནེ་(Chennai)གྲོང་ཁྱེར་དུ།

དགོང་མོ་དུས་ཚོད་དགུ་དང་ཕྱེད་ཀ་ཙམ་དུ་ཟླ་བའི་བསིལ་ཟེར་གྱི་འོག། གསེར་མཐའི་བརྒྱན་པའི་མ་ནི་འཁོར་ལོ་ཟུང་གི་འགྲམ་དུ་གཞོན་ཤ་དོད་པའི་བོད་ཀྱི་མཐོ་རིམ་སློབ་མ་བཅུ་གྲངས་ཤིག་འཛོམས་ཤིང་། ནང་ལོགས་སུ་བཀྲ་ཤིས་རྟགས་བརྒྱད་ཀྱི་གཡང་གིས་ཕྱུག་པའི་ཟ་ཁང་ཆུང་ཆུང་ཞིག་འདུག་སྟེ།སྒོ་བྱང་དུ་༼MOMOSaKhang༽ཞེས་དབྱིན་ཡིག་གིས་ཆེན་པོར་བྲིས་འདུག་ལ།དེའི་འོག་ཏུ་གསེར་ཡིག་གིས་བྲིས་པའི་དབུ་མེད་ཀྱིས་༼མོག་མོག་ཟ་ཁང་༽ཞེས་བཀོད་འདུག་པའི་སྟེང་དུ་གློག་འོད་ཆེམ་ཆེམ་དུ་འཕྲོ།འདི་ནི་ཐེངས་དང་པོར་༼མ་གཅིག༽་གིས་ས་ཕྱོགས་གང་སར་སྤེལ་བཞིན་པའི་ཟླ་རེའི་༼ཁ་བརྡ༽་ལ་བསུ་མ་བྱེད་སྟངས་ཤིག་ཡིན་པ་གདོན་མི་ཟ།

ཐེངས་འདིར་མ་གཅིག་གི་༼ཁ་བརྡ༽་དང་པོའི་ཐོག་ཅན་ནེ་རུ་ཡོད་པའི་བོད་རིགས་མཐོ་རིམ་སློབ་མ་དང་ལས་ཞུགས་པ་བཅས་ཁྱོན་མི་གྲངས་༡༤་འཛོམས་འདུག། དེ་རུ་ས་གནས་གོ་སྒྲིག་པས་ཐོག་མར་༼མ་གཅིག༽་གི་སྐོར་མདོར་བསྡུས་ཤིག་ངོ་སྤྲོད་བྱས་ཤིང་། ལྷག་པར་དུ་མ་གཅིག་གིས་བོད་ནང་ལོགས་གཙོར་བཟུང་ནས་སྤྱི་ཚོགས་དྲ་རྒྱའི་བརྒྱུད་ལམ་ནས་སྤྱི་ཚོགས་དང་ཤེས་ཡོན་ལས་འགུལ་འདྲ་མིན་སྤེལ་བཞིན་པ། དེའི་ནང་ནས་གཅིག་ནི་དེ་རིང་གི་ཟླ་རེའི་༼ཁ་བརྡ༽་ཡིན་པ་བཅས་བཤད།དེ་ནས་བརྗོད་གཞི་གཙོ་བོ་༼བསླུ་བྲིད༽་དང་འབྲེལ་ནས་པད་མ་ཚེ་བརྟན་གྱི་སྒྲུང་ཐུང་༼ཨོ་རྒྱན་གྱི་སོ༽་བརྒྱུད་ནས་བོད་ནང་གི་དངོས་ཡོད་འཚོ་བ་གླེང་སློང་བྱས་ཤིང། དེ་ནས་བོད་ཀྱི་སྒྱུ་རྩལ་ལས་རིགས་ཀྱིས་བོད་དེ་རྒྱལ་སྤྱིའི་སྟེང་འཁྱེར་ཡོང་བའི་ནུས་པ།གཞན་ཡང་སོ་སོའི་སེམས་ནང་དུ་བོད་ཅེས་པ་ཇི་འདྲ་ཞིག་ཡིན་མིན་སོགས་ཀྱིས་བོད་ཀྱི་སྐོར་སྐད་ཆ་བཤད་འགོ་བརྩམས།

དང་པོ། ༼ཨོ་རྒྱན་གྱི་སོ༽འི་སྒྲུང་ཐུང་དེ་བཀླགས་པའི་སྐོར་ནས་བཤད་དོན།སྤྱིར་ཀློག་པ་པོ་ཁོ་རང་གིས་པད་མ་ཚེ་བརྟན་གྱི་སྒྲུང་ཐུང་༼གྲོང་ཁྱེར་གྱི་འཚོ་བ༽་སོགས་གཞན་འགའ་བཀླགས་མྱོང་བ་དང། ལྷག་པར་དུ་པད་མ་ཚེ་བརྟན་གྱི་༼ཁྱི་རྒན༽་དང་༼ཐར་ལོ༽་སོགས་གློག་བརྙན་རིགས་ལ་བལྟས་པས། ཁོང་གིས་དེ་དག་ལས་པད་མ་ཚེ་བརྟན་རང་གི་ཕ་ཡུལ་ལ་དུང་ཞེན་ཆེ་བ།ལྷག་པར་དུ་ཕ་ཡུལ་གྱི་འཚོ་བ་དང་དེའི་ཁྲོད་ནས་བོད་མི་ཚོའི་མི་ཤིགས་པའི་དད་པ།འདོོད་ཆུང་གི་འཚོ་བ།བྱམས་སེམས་ཆེ་བ།སྙིང་རྗེ་ལྡན་པ་སོགས་ནི་གླེང་རིན་ལྡན་པ།བཤད་སྙིང་ཡོད་པའི་བརྗོད་བྱ་རྐྱང་རྐྱང་ཡིན་པ་ཁོ་རང་གི་སྒྲུང་ཐུང་དང་གློག་བརྙན་ནས་གསལ་བོར་བསྟན་འདུག་ཟེར། དཔེར་ན་༼ཨོ་རྒྱན་སོ༽འི་ནང་གི་ཨོ་རྒྱན་སྤྲུལ་སྐུར་ངོས་བཟུང་བའི་སྔ་རྗེས་གཉིས་ཀྱི་ཁྱད་པར་ལས་མི་རྣམས་ཀྱིས་ཁོང་ལ་བརྩི་འཇོག་བྱེད་སྟངས་མི་འདྲ་བ། མཐའ་ན་ཁོང་གི་ཨང་རྩིས་དགེ་རྒན་དེ་ཤེས་ཡོན་ཅན་ཞིག་ཡིན་ཡང་ད་དུང་ཨང་རྩིས་མི་ཤེས་པའིི་སྤྲུལ་སྐུ་ཨོ་རྒྱན་མདུན་དུ་སྐྱབས་འཇུག་ཞུ་རུ་ཡོང་བ་མ་ཟད།མི་གཅིག་ལ་སོ་སུམ་ཅུ་ཡས་མས་ལས་མེད་ནའང་ཨོ་རྒྱན་ལ་སོ་ལྔ་བཞི་ཡོད་པར་སྣང་ནས་དེ་གཟུངས་གཞུག་ཏུ་བཞག་ནས་མཆོད་རྟེན་བཞེངས་པ་བཅས་ནས་བོད་མི་ཚོའི་དད་པའི་སྟོབས་ཤུགས་ཤིག་མངོན་ཡོད་པ་སོགས་གསུངས།

གཞན་པ་གཅིག་གིས་སོ་སོའི་མྱོང་ཚོར་ལྟར་ན།པད་མ་ཚེ་བརྟན་གྱིས་བོད་ཀྱི་འཚོ་བ་དངོས་དང་འབྲེལ་ནས་བོད་མིའི་སྤྱི་ཚོགས་དེ་ད་དུང་རྗེས་ལུས་ཀྱི་རྣམ་པ་ཡིན་པ་བཤད་ཀྱི་འདུག་ཟེར། དེང་དུས་ཀྱི་འཚོ་བ་ལ་ཁ་ཐག་རིང་བའི་བོད་མིི་ཚོ་གཉིད་ལས་སད་དུ་བཅུག་ནས་བོད་ཀྱི་སྤྱི་ཚོགས་འཚོ་བ་ཡར་རྒྱས་སུ་འགྲོ་དགོས་པར་སྐུལ་མ་གཏོང་བཞིན་ཡོད་རེད་ཅེས་བཤད། ཡང་གཞན་པ་གཅིག་གིས་པད་མ་ཚེ་བརྟན་གྱིས་རང་གི་སྒྲུང་ཐུང་དང་གློག་བརྙན་བརྒྱུད་ནས་རྒྱལ་སྤྱིའི་སྟེང་བོད་ཀྱི་འཚོ་བ་དངོས་ག་འདྲ་ཞིག་ཡིན་མིན་སྟོན་གྱི་ཡོད་པ་དང་དེ་ནི་བོད་ངོ་སྤྲོད་བྱེད་སྟངས་ཤིག་རེད་ཟེར།

གཉིས་པ། འཛུལ་ཞུགས་པ་གཅིག་གིས་རང་ཉིད་རྒྱ་གར་དུ་སྐྱེས་པ་ཞིག་ཡིན་ཡང་ལྷ་སར་ཐེངས་གཅིག་འགྲོ་ཐུབ་ནས་དེར་ཟླ་བ་གཅིག་ཙམ་བསྡད་པའི་སྐབས་ཀྱི་མྱོང་ཚོར་བཤད་དོན།ཐོག་མར་ལྷ་སའི་གནམ་ཐང་དུ་འབྱོར་དུས་བོད་མི་ཞིག་ཡིན་ཕྱིན་ལོགས་སུ་དབྱེ་བ་བཀར་ནས་ཡིག་ཆ་སོགས་ལ་བརྟག་དཔྱད་དང་འདྲི་གཅོད་བྱས་ནས་དུས་ཚོད་གཉིས་མ་ཟིན་ཙམ་ཞིག་བཀག་བྱུང་བས་སེམས་ཁྲལ་དང་སྐྱོ་སྣང་ཞིག་སླེབས་བྱུང་ཟེར། ཡིན་ཡང་ལྷ་སར་སླེབས་དུས་རང་ཉིད་ཀྱིས་སེམས་ནང་བསམ་པ་ལས་ལྷག་པ་ཞིག་རེད། དེ་ལ་ཡོད་པའི་རི་མཐོ་བོ་དེ་དག་གི་མགོར་གངས་ཀྱིས་ཁེབས་ཤིང་དེའི་ཁྲོད་ན་ཕོ་བྲང་པོ་ཏཱ་ལ་གཟི་བརྗིད་ལྡན་པའི་ངང་ཡོད་པ་མཐོང་དུས་བཤད་མི་ཤེས་པའི་ཚོར་བ་ཞིག་སྤྲད་སོང་བར་བཤད། དེ་ནས་སེ་འབྲས་དགའ་གསུམ་དུ་མཇལ་སྐོར་དུ་ཕྱིན་སྐབས་ཀྱང་བོད་མི་ཚོ་ཕན་ཚུན་ལ་དགའ་སྣང་ཆེ་བ་དང་རོགས་རམ་སོགས་གནང་བྱུང་བས། བོད་པ་ཟེར་བ་དེ་ངོ་མ་བྱམས་སྙིང་རྗེ་ཆེ་བ་ཞིག་ཡིན་པ་ཚོར་སོང། ཁོང་ལ་དེ་ལས་ཀྱང་བག་ཆགས་ཟབ་པ་ནི་ལྷ་སའི་ཟ་ཁང་ནང་དུ་སོང་ན་བོད་ཇ་ཚ་པོ་ཇ་དེམ་གང་དང་པོར་སྤྲད་ཀྱི་འདུག་ལ་དེ་ནི་སྣེ་ལེན་བྱེད་སྟངས་མི་འདྲ་བ་ཞིག་མཐོང་བྱུང་ཟེར། མཐའ་ན་ལྷ་སའི་བོད་མོ་དེ་ཚོའང་སྙིང་རྗེ་མོ་ཞེ་དྲག་འདུག་ཟེར་ནས་འཛུལ་ཞུགས་པ་ཚང་མ་དགོད་སྒྲས་ཁེངས་སོང། 

Our local host explaining the agenda for the gathering

གསུམ་པ། འཛུལ་ཞུགས་པ་གཞན་འགས་བོད་དེ་རྒྱལ་སྤྱིའི་སྟེང་མཉམ་དུ་འགྲོ་ཐུབ་པར་ཚོང་ལས་དཔལ་འབྱོར་གྱི་ཐད་ནས་ནུས་ཤུགས་འདོན་དགོས་ཚུལ་དང་། དེའང་གཅིག་གིས་ཁོ་རང་རྒྱ་གར་དུ་དགུན་ཚོང་བྱེད་དུ་འགྲོ་མྱོང་ཡོད་ལ་དེ་རུ་བོད་མི་ཚོང་བ་ཚོས་རྡོག་རྩ་གཅིག་སྒྲིལ་ངང་ཚོང་ལས་གཉེར་སྟངས་དེས་སེམས་ཤུགས་འཕར་མ་ཞིག་གནང་སོང་ཟེར།དེར་ཡོད་ཚོང་བ་ཚང་མས་རྒྱ་ནག་གི་ཅ་དངོས་གཅིག་ཀྱང་མི་བཙོང་བར་བོད་མི་རང་ངོས་ནས་བཟོས་པའི་ཅ་ལག་བཙོང་གི་འདུག། གལ་ཏེ་བོད་མིས་བཟོས་པའི་ཅ་དངོས་འདི་དག་ཚོང་རྭ་ཆེན་པོ་དེ་འདྲ་རུ་འགྲོ་ཐུབ་ན་ཁོང་ཚོའི་ཚོང་ལས་དཔལ་འབྱོར་ཡར་རྒྱས་དང་བོད་མི་ཚོང་གཉེར་བ་དང་ཁེ་ལས་པ་མང་པོ་ཐོན་ཐུབ་རྒྱུ་རེད་གསུངས།

བཞི་པ། འཛུལ་ཞུགས་པ་གཅིག་གིས་རང་ཉིད་གློག་ཀླད་དང་འཕྲུལ་ཆས་ཚན་རིག་ཐོག་སློབ་གཉེར་བྱེད་པའི་བརྒྱུད་རིམ་ཁྲོད་ནས་བོད་ཀྱི་དེང་དུས་འཕྲུལ་རིག་གི་སྐོར་ལ། ཐོག་མར་བོད་ཀྱི་སྐད་ཡིག་དང་རིག་གཞུང་སོགས་གལ་ཆེན་པོ་ཡིན་པ་དང་དེ་དག་སྲུང་སྐྱོབ་བྱེད་རྒྱུ་ནི་དེ་ལས་ཀྱང་གཙིགས་ཆེན་རེད། ཡིན་ཡང་དེ་ཚོ་དུས་རབས་དང་མཐུན་པར་འགྲོ་མ་ཐུབ་ན་ནམ་ཞིག་ཉམས་རྒུད་དུ་འགྲོ་རྒྱུ་ཡིན་པ་ཉག་གཅིག་རེད་ཟེར། བོད་ཕྱི་ནང་གང་ཡིན་ཡང་ད་ལྟའི་ཆར་དེང་དུས་འཕྲུལ་རིག་ཤེས་བྱའི་སྐོར་ནས་ད་དུང་རྗེས་ལུས་ཡིན་པ་དང་། འདིའི་སྐོར་ནས་བོད་མི་གཞོན་སྐྱེས་མང་པོ་སྐྱེད་སྲིང་བྱ་རྒྱུ་གནད་འགག་ཡིན་པར་གསུངས།གལ་ཏེ་དེང་དུས་ཀྱི་འཕྲུལ་ཆས་དང་དྲ་རྒྱའི་དུས་རབས་འདིར་བོད་ཀྱི་སྐད་ཡིག་བེད་སྤྱོད་ཀྱིས་སྤྱོད་སྒོ་ཆེ་རུ་སོང་ན་སྐད་ཡིག་སྲུང་སྐྱོབ་བྱེད་སྟངས་ཤིག་ཡིན་པ། དྲ་རྒྱའི་བརྒྱུད་ལམ་ཁག་ནས་གཞོན་སྐྱེས་ཚོས་བོད་ཡིག་དང་སྐད་ཡིག་གཞན་མཉམ་དུ་བེད་སྤྱོད་བྱེད་དགོས་པ་གལ་ཆེན་པོ་ཡིན་ཚུལ་སོགས་ཚོར་ཤུགས་ཆེན་པོས་བརྗོད་སོང་།

ལྔ་པ། འཛུལ་ཞུགས་པ་གཅིག་གིས་ཁ་བརྡ་འདི་བརྒྱུད་ནས་ང་ཚོ་ཚང་མས་ཕ་ཡུལ་བོད་ལ་རྒྱུས་ལོན་མང་དུ་བྱེད་དགོས་པ། བོད་ཕྱི་ནང་གཉིས་ཀྱི་གནས་སྟངས་དང་བོད་མིའི་འཚོ་བ།གཞོན་སྐྱེས་ཚོས་བོད་ཀྱི་རྩ་དོན་ཐད་ནུས་པ་མཉམ་སྤུངས་དགོས་པ། དེ་ཡང་ཡིན་གཅིག་ཆབ་སྲིད་གཅིག་པུ་ཡིན་པའི་ངེས་པ་མེད་པར།༼མ་གཅིག༽་ནང་བཞིན་བོད་ཕྱི་ནང་གང་ཡིན་རུང་ལས་དོན་འདྲ་མིན་ཐོག་ནུས་པ་འདོན་རྒྱུ་འདུག་ཏེ། ཤེས་ཡོན་ཡར་རྒྱས། སྤྱི་ཚོགས་ཡར་རྒྱས། དཔལ་འབྱོར་ཡར་རྒྱས། རིག་གཞུང་རྒྱུན་འཛིན། སྐད་ཡིག་སྲུང་སྐྱོབ་སོགས་རང་རང་སོ་སོས་ནུས་པ་གང་ལྕོགས་ཀྱིས་འགན་འཁུར་ལེན་རྒྱུ་བྱུང་ན། བོད་ནང་དང་རྒྱལ་སྤྱིའི་ཐོག་ཏུ་བོད་ཀྱི་ངོ་བོ་འཛིན་ཐུབ་པ་དང་བོད་མི་རིགས་ཀྱི་ཆིག་སྒྲིལ་ལའང་ཕན་ཐོགས་ཆེན་པོ་ཡོད་ཚུལ་བརྗོད།

དྲུག་པ། འཛུལ་ཞུགས་པ་རེ་འགས་བོད་ཀྱི་གླུ་གཞས་སྒྱུ་རྩལ་གྱི་སྐོར་ནས་བཤད་དོན།ཁོ་མོ་ནི་རྒྱ་གར་དུ་སྐྱེས་པ་ཞིག་ཡིན་མོད་བོད་ནང་གི་གླུ་གཞས་ལ་ཤིན་ཏུ་དགའ་ཞིང་གཞས་མ་ཚེ་དབང་ལྷ་མོའི་གླུ་སྐད་ཀྱིས་ཕ་ཡུལ་བོད་དང་སེམས་ཐག་ཉེ་རུ་ཡོང་བའི་ཚོར་སྣང་སླེབས་ཀྱི་འདུག་ཟེར། དེར་བརྟེན་ནས་བོད་ནང་ལོག་གི་བོད་མི་རྣམས་མི་རིགས་ཀྱི་ལ་རྒྱ་ཆེ་བ་དང་མི་རིགས་ཀྱི་འདུ་ཤེས་ཟབ་པ་ཤེས་པས། རང་ཉིད་ཡིན་ཡང་ནམ་རྒྱུན་བོད་སྐད་གཙང་མ་བཤད་ཅི་ཐུབ་དང་བོད་གཞས་ལ་ཉན་གྱི་ཡོད་ལ་དེ་འདྲ་བྱེད་ཐུབ་ན་ཡག་པོ་མཐོང་སོང། ལྷག་པར་དུ་ནུབ་ཕྱོགས་སུ་ཡོད་པའི་བོད་མི་ན་ཆུང་དང་གཞོན་སྐྱེས་ཚོས་འདིའི་ཕྱོགས་ནས་དོ་སྣང་བྱེད་ཐུབ་ན། བོད་ཀྱི་གླུ་གཞས་སྒྱུ་རྩལ་ཁྲོད་ནས་ང་ཚོ་ཚང་མ་བོད་པ་གཅིག་ཡིན་པའི་འདུ་ཤེས་བསྐྲུན་ཐུབ་པར་ཕན་ནུས་ལྡན་པར་གསུངས།

མཐའ་མཇུག་ཏུ། ས་གནས་གོ་སྒྲིག་པས་ཁ་བརྡ་བ་ཚང་མར་མཉམ་འཛོམས་བྱུང་བར་བཀའ་དྲིན་ཆེ་ཞུ་བ་དང་སྦྲགས་རང་ཉིད་ཆུང་དུས་སུ་བོད་དུ་སློབ་གྲྭར་སོང་མྱོང་ཡང་བོད་ཀྱི་གནས་སྟངས་དང་༧རྒྱལ་བ་རིན་པོ་ཆེ་སྐོར་སོགས་ཅི་ཡང་ཤེས་ཀྱི་མེད་པ་དེར་ཕྱིར་འདང་ཞིག་རྒྱག་བཞིན། རྒྱ་ནག་གིས་བོད་དུ་བཟུང་བའི་སྐད་ཡིག་རྩ་མེད་བཟོ་བའི་སྲིད་ཇུས་ལག་བསྟར་བྱས་པ་དེ་སྔོན་མ་ནས་ཡོད་པ་གཞི་ནས་ཚོར་བ་དང་། བོད་ནང་གི་སློབ་གྲྭ་ཁག་ཏུ་༠༨་ལོའི་ཞི་རྒོལ་ཆེན་མོའི་རྗེས་སུ་སྲིད་ཇུས་ངན་པ་དེ་ཤུགས་ཆེན་སྤེལ་བར་བལྟས་ན།ད་ལྟ་ཕྱི་ལོགས་སུ་ཡོད་པའི་ང་ཚོ་བོད་པའི་གཞོན་སྐྱེས་ཚོས་བོད་ཀྱི་སྐད་ཡིག་མི་ཉམས་རྒྱུན་འཛིན་བྱེད་དགོས་པ། དེའང་ཉིན་རེའི་དྲ་ཐོག་གི་འཚོ་བའི་ནང་པར་གཅིག་བཞག་རུང་འོག་ཏུ་བོད་ཡིག་གི་མཆན་འབྲི་བ་ནས་འགོ་བཙུགས་ནས་ཉིན་རེའི་ཟིན་བྲིས་ཐན་ཐུན་བོད་ཡིག་ནང་འབྲི་བ་སོགས་ནས་བོད་ཡིག་བེད་སྤྱོད་བྱེད་ན་འགྲིག་ལ། དེ་ལས་ཀྱང་བཟང་ན་བོད་ཀྱི་སྐད་ཡིག་ཡར་རྒྱས་དར་སྤེལ་གཏོང་ཐུབ་རྒྱུ་དེ་རེད། བོད་ཀྱི་སྐད་ཡིག་དང་རིག་གཞུང་ལ་སློབ་གཉེར་བྱས་ནས་དེང་དུས་ཀྱི་སྤྱི་ཚོགས་དང་མཐུན་པའི་ངང་བོད་ཀྱི་ཐ་སྙད་གསར་པ་བཟོ་བ་ནས་བོད་ཀྱི་རྩོམ་རིག་སོགས་ནུབ་ཕྱོགས་སྤྱི་ཚོགས་སུ་ངོ་སྤྲོད་བྱེད་པ་སོགས་ལས་དོན་འདྲ་མིན་བརྒྱུད་ནས་བོད་ཀྱི་རིག་གནས་སྲུང་སྐྱོབ་བྱེད་རྒྱུ་དེ་གལ་ཆེན་ནང་གི་དོན་ཆེན་ཞིག་ཡིན་པ་བཤད་ནས་ཁ་བརྡ་ཐེངས་དང་པོ་ལེགས་འགྲུབ་ངང་མཇུག་བསྡུས་སོ།

​ས་གནས་གོ་སྒྲིག་པ།
ཀུན་ཚེ་ནས་སྤེལ་བ་དགེའོ

Group photo from the inaugural Machik Khabda gathering in Chennai